थोर तुझे उपकार
आई ! थोर तुझे उपकार ।। ध्रु० ।।
वदत विनोदें हांसत सोडी
कोण दुधाची धार ।। १ ।।
नीज न आली तर गीत म्हणे
प्रेम जिचें अनिवार ।। २ ।।
येई दुखणे तेव्हां मजला
कोण करी उपचार ।। ३ ।।
कोण कड़ेवर घेउनि फिरवी
चित्ती लोभ अपार ।। ४ ।।
बाळक दुर्बळ होतों तेव्हां
रक्षण केले फार ।। ५ ।।
त्वांचि शिकविले वाढविले त्वां
आहे मजवर भार ।। ६ ।।
स्मरण तुझ्या या दृढ़ ममतेचें
होंते वारंवार ।। ७ ।।
नित्य करावे साह्य तुला मीं
हा माझा अधिकार ।। ८ ।।
– भास्कर दामोदर पाळंदे
