Uttarakhand Accident: उत्तराखंडमधील उत्तरकाशी जिल्ह्यातून दु:खद बातमी येत आहे. येथे गंगोत्री महामार्गावर गंगनानीजवळ प्रवाशांना घेऊन जाणारी बस खोल दरीत कोसळली. ज्यामध्ये 7 जणांचा जागीच मृत्यू झाला आहे. तर या अपघातात 28 जण जखमी झाले आहेत. या बसमध्ये प्रवास करणाऱ्या प्रवाशांची संख्या 35 असल्याचे सांगण्यात येत आहे. जखमींना रुग्णालयात दाखल करण्यात आले आहे.
रविवारी गंगोत्रीहून उत्तरकाशीच्या दिशेने 35 प्रवाशांना घेऊन येणारी बस तालुका भटवाडी अंतर्गत येणाऱ्या गंगोत्री राष्ट्रीय महामार्गावरील गंगनानीजवळील दरीत कोसळली.
ज्या ठिकाणी हा अपघात झाला तेथे गंगनानीला तीव्र वळण आहे. यामध्ये बस चालकाचा तोल गेला असावा. बस 70 मीटर दरीत कोसळली.
अपघाताची माहिती मिळताच पोलिस अधीक्षक घटनास्थळी पोहोचले आणि मदत आणि बचाव कार्यात गुंतले. यासोबतच जिल्हा प्रशासन, पोलीस, एनडीआरएफ, एसडीआरएफ आणि वैद्यकीय पथकांनी घटनास्थळी पोहोचून जखमींना बाहेर काढले. ज्यांना उत्तरकाशीतील विविध रुग्णालयात उपचारासाठी पाठवण्यात आले आहे. बसमधील प्रवासी हे गुजरातचे यात्रेकरू असल्याचे सांगण्यात येत आहे.
उत्तरकाशीमध्ये प्रवाशांची बस खड्ड्यात पडल्याप्रकरणी मुख्यमंत्री पुष्कर सिंह धामी यांनी तातडीने मदत आणि बचाव कार्य करण्याच्या सूचना दिल्या. मुख्यमंत्र्यांनी जिल्ह्याचे प्रभारी मंत्री आणि अतिरिक्त मुख्य सचिवांना या घटनेवर लक्ष ठेवण्याच्या सूचना दिल्या.
